‘आजको दिनसम्म कर्णाली प्रदेशमा धेरै सेवा दिने एयरलाइन्स् तारा एयर हो । कर्णालीको सबै एयरपोर्टहरुमा ताराले सेवा दिएको छ,’ प्रवक्ता राईले भने, ‘अहिलेको प्रदेशको माग भनेको राजधानी सुर्खेतबाट उडान हुनुपर्ने भन्ने हो । लोड भए हामी तयार छौँ ।’
राईका अनुसार नेपालगञ्जबाट यात्रुहरु पाउने र कार्गो(सामान) हरु पनि पाइने हुँदा उताबाट फ्लाइट धेरै हुने गरेको छ । आजको दिनमा नेपालगञ्जबाटै कर्णालीका जिल्लाहरुमा फ्लाइट हुँदै आएको छ । तर कर्णालीका लागि फाइदाका हिसाबले नेपालगञ्जबाट भन्दा सुर्खेतबाट १२–१३ मिनटनै छिटो हुने उनको भनाइ छ ।
अहिले सुर्खेतमा लो–अकुपेन्सीका कारण फ्लाइटमा समस्या छ । तर प्रदेश सरकारले सिट फुल नभए क्षतिभरण गर्ने प्रतिबद्धता जनाएको छ । यसमा गृहकार्य भइरहेको राईले बताए ।
‘केहि दिनका लागि सुर्खेतबाट फ्लाइट गर्छौँ । त्यसको अवस्था हेरेर रणनीति बनाउछौँ । राइले भने, ‘अबको एक हप्तामा के गर्ने हो सोको निर्णय दिइसक्छौँ ।’
तत्कालिन तयारी भ्रमण वर्षको, लक्ष्य निरन्तरताको
राजधानी सुर्खेतदेखि प्रदेशको विभिन्न जिल्लामा निरन्तर उडान नभइरहेको अवस्थामा प्रदेश सरकारले भ्रमण वर्ष २०२० लाई मुख्य लक्ष्य गरेको छ । भ्रमण वर्ष २०२० लाई निउ पारेर प्रदेशमा नियमित उडान गराउने दाउमा छ । त्यसो त भ्रमण वर्ष सफल पार्नकै लागि भने पनि कर्णाली प्रदेशमा नियमित उडान अनिवार्य छ ।
भ्रमण वर्ष २०२० मा कर्णाली प्रदेशले न्यूनतम एक लाख पर्यटक भित्र्याउने लक्ष्य राखेको छ । सडक पूर्वाधारको अवस्था अत्यन्त कमजोर रहेको प्रदेशमा एक मात्र विकल्प हवाई सेवा नै हो । त्यसैले पनि प्रदेश सरकार लो–अकुपेन्सीको घाटा वेहोरेर भएपनि प्रदेशमा नियमित उडान भराउने नीतिमा छ ।
अहिले प्रदेशवासीहरुकै लागि राजधानी आवतजवतमा समस्या छ । प्रशासनिक कामका लागि ३–४ दिन खर्च गर्नु पर्ने अवस्था छ । ‘यस्तो अवस्थामा बाहिरबाट कसरी पर्यटक भित्रिन्छन् ?,’ प्रदेश पर्यटन मन्त्री नन्दसिंह बुढाले भने, ‘हामीले पर्यटकको सहताका लागि भने पनि प्रदेशमा नियमित उडान गराउनुपर्छ । यो हाम्रो मात्र नभएर केन्द्र सरकारको समेत चासोको विषय हो ।’
कर्णाली प्रदेशमा अपेक्षित एक लाख पर्यटक भित्र्याउन सहज उडान अनिवार्य भएको भ्रमण वर्ष २०२० का कर्णाली प्रदेशका संयोजक राजु कार्की बताउँछन् । प्रदेशले लगानी गरेर भएपनि प्रदेशका पर्यटकीय गन्तव्यहरुमा नियमित हवाई उडान गराउनु पर्ने उनको भनाइ छ ।
‘अहिलेकै अवस्थामा प्रदेशमा एक लाख पर्यटक भित्रिने अवस्था छैन । त्यसका लागि प्रदेशले पहिलो प्राथमिकता पर्यटकमैत्री वातावरण तयार गर्नेतर्फ दिनुपर्छ,’ संयोजक कार्कीले भने, त्यसको एउटै विकल्प हो प्रदेशको हवाई सेवा । प्रदेशमा नियमित उडान हुने हो र सहज वातावरण हुने हो भने एक लाख मात्र होइन त्योभन्दा बढी प्रदेशले पर्यटक पाउँछ ।’
पर्यटन प्रबद्र्धनकै लागि प्रदेशभित्रका पर्यटन व्यवसायीहरु समेत एकमत भएका छन् । अहिले प्रदेश भित्रका पर्यटकीय क्षेत्रहरुको पहिचान प्रबद्र्धन र प्रचार प्रसारमा प्रदेश सरकारदेखि स्थानीय तह र प्रदेश भित्रका व्यवसायीहरु लागि परेका छन् । अझ भ्रमण वर्षको प्रभावकारीताका लागि प्रदेशले विभिन्न समिति उपसमित बनाएर जिम्मेवारी बाडफाड गरेर अघि बढेको छ
जनता भ्वाइस 
