एक अर्ब २९ करोड नक्कली भ्याट बिल प्रकरणमा २१ विरूद्ध मुद्दा

राजस्व अनुसन्धान विभागले ललितपुर महानगरपालिका-३ धोबिघाटका विनोदकुमार अग्रवाल, ललितपुर-२३ का विकास अग्रवालसहित २१ फर्महरूविरूद्ध काठमाडौं जिल्ला अदालतमा मुद्दा दायर गरेको छ।

झूटो तथा नक्कली मूल्य अभिवृद्धि कर बिजक प्रयोग गरी एक अर्ब २९ करोड ३६ लाख एक हजार पाँच सय ६२ रुपैयाँ राजस्व चुहावट गरेको अभियोगमा विभागले आइतबार अग्रवालसहित २१ जनाविरूद्ध मुद्दा दायर गरेको हो।

निम्न आर्थिक अवस्था भएका मजदूरहरूको नाममा फर्म दर्ता गरी झूटा तथा नक्कली मूल्य अभिवृद्धि कर बिजक प्रयोग गरेर सो बराबरको रकम राजस्व चुहावट गरेको विभागले जनाएको छ।

उनीहरूले विभिन्न व्यक्तिका नाममा आर्यन ट्रेडिङ कन्सर्न, अनामिका ट्रेडर्स, अमिशा ट्रेडिङ कन्सर्न, प्रसुमा सप्लायर्स प्रालि, स्मारिका जनरल सप्लायर्स, नाइस ट्रेडिङ, जेनिशा ट्रेड एण्ड सप्लायर्स, सुशीम ट्रेड इन्टरप्राईजेज प्रालि, सिमस ट्रेड इन्टरनेसनल, निशिला ट्रेडिङ, अविन ट्रेडिङ, किशा ट्रेड इन्टरप्राइजेज, श्रीअन्तु जनरल सप्लायर्स समेतका १३ वटा विभिन्न फर्म र कम्पनीहरू दर्ता गरी वास्तविक रूपमा मालवस्तु खरिद विक्री नै नगरी विभिन्न फर्महरूलाई झूटो तथा नक्कली मूल्य अभिवृद्धि कर बिजक मात्र विक्री गरेको विभागले जनाएको छ।