जनता भ्वाइस काठमाण्डौ बैशाख ५, बैदेशिक रोजगारीको शिलसिलामा कतारबाट फर्किएका कामदारहरुलाई प्रयोग गरी त्रिभुवन अन्तर्राष्ट्रिय विमानस्थलबाट सुनका गर गहनाहरु तस्करी गर्ने ३ जनालाई प्रहरीले पक्राउ गरेको छ । पक्राउ पर्नेहरुमा काठमाडौँ महानगरपालिका–१७ ठहिटी बस्ने ३६ बर्षीय रतनलाल श्रेष्ठ, काठमाडौँ महानगरपालिका–६ बौद्ध बस्ने उदयपुर त्रियुगा नगरपालिका–१६ घर भएका २२ बर्षीया लिलाकुमारी श्रेष्ठ र सिराहा लहान नगरपालिका–१५ बस्ने २० बर्षीय इन्द्र सदे रहेका छन् ।
त्रिभुवन अन्तर्राष्ट्रिय विमानस्थलबाट भंसार छली सुनका गर गहनाहरु मोटरसाइकलमा राखी लैजादै गरेको सूचना प्राप्त भएपछि महानगरीय प्रहरी प्रभाग कोटेश्वरबाट खटिएको प्रहरी टोलीले मंगलबार कोटेश्वर चोक नजिक सवारी साधन चेकजाँच गर्ने क्रममा स.२प ४०२८ नम्बरको पल्सर मोटरसाइकलमा २ जनाले ५० ग्रामको सुनको ४ वटा चुरा र तत्काल मोटरसाइकलमा सवार व्यक्तिको सम्पर्कमा आएका व्यक्तिको साथबाट ५० ग्रामको १ वटा चुरा गरी ५ गरी जम्मा २ सय ५० ग्राम सुन बरामद भएको थियो । उनीहरुलाई प्रहरीले आवश्यक कारबाहीको लागि राजश्व अनुसन्धान विभाग हरिहरभवन पुल्चोक ललितपुरमा पठाएको छ ।
