जनता भ्वाइस काठमाडौं। प्रमुुख प्रतिपक्षी दल नेपाली कांग्रेसभित्र चर्किएको विवाद सुल्झाउन दुई पक्षका शिर्ष नेताहरुका बीचमा अहिले बैठक हुन लागेको छ । गत बिहीबारको केन्द्रीय समितिको बैठक बहिस्कार गरेर रुष्ट भएको बरिष्ठ नेता रामचन्द्र पौडेल पक्षसँग सभापति शेरबहादुर देउवासहितको टोलीले छलफल गर्ने भएको हो ।
छलफलका लागि सभापति देउवासहितको टोली बरिष्ठ नेता पौडेल निवास बोहोराटारमा अहिले विहान १० बजेतिर पुग्ने कार्यक्रम रहेको छ ।
गत बिहीबारदेखि सुरु भएको केन्द्रीय समितिको बैठकका लागि महाधिवेशनको तालिका सम्वन्धी विषयलाई छलफलको विषय सूचीमा नराखिएको भन्दै बरिष्ठ नेता पौडेल पक्षले बैठक बहिस्कार गरेको थियो ।
कांग्रेसभित्र महाधिवेशनको कार्यतालिका, विभागको संख्या तथा भागबण्डा, भ्रातृ संगठनको नेतृत्व लगायतका विषयमा विवाद चर्केको छ ।
महाधिवेशनको कार्यतालिकालाई बैठकको प्रमुख एजेण्डा नबनाएसम्म बैठकमा सहभागी नहुने पौडेल पक्षको अडान र अन्तरिम संरचना समायोजनको काम नसकिएसम्म कार्यतालिकामा छलफल गर्न नसकिने सभापति देउवापक्षको अडान छ ।
पौडेल पक्षले बहिस्कार गरेपनि गत बिहीबार २६ गते सुरु भएको कांग्रेस केन्द्रीय समितिको आगामी बैठक भोली फेरी बस्ने तय गरिएको छ । भोलीको बैठकलाई सहज रुपमा अगाडी बढाउन सभापति देउवाले सरोकारावालाहरुसँग छलफल गर्न लाग्नु भएको हो ।
१३ औं महाधिवेशनबाट निर्वाचित केन्द्रीय पदाधिकारी तथा सदस्यहरूको ४ वर्षे अवधि आगामी फागुनमा सकिंदैछ । पार्टी विधानको दफा ४३ ले असाधारण स्थिति भएमा केन्द्रीय कार्यसमितिले बढीमा एक वर्षसम्म अवधि लम्ब्याउन सक्ने प्रावधान गरेको छ ।
यस्तै संविधानको राजनीतिक दल सम्बन्धी व्यवस्थामा ५ वर्षभित्र केन्द्रीय पदाधिकारी र सदस्यको निर्वाचन गरिसक्नुपर्ने प्रावधान उल्लेख छ । संविधानले विशेष परिस्थितिमा ६ महिना बढाउन सकिने व्यवस्था गरेको छ ।
संविधानको यही प्रावधानलाई टेकेर आफ्नो पदावधि डेढ वर्ष लम्ब्याउन खोजेको तथा विभागको संख्या थपेर महाधिवेशनमा आफ्नो पकड बलियो बनाउन खोजेको आरोप सभापति देउवामाथि संस्थापन इतर पक्षले लगाउने गरेको छ ।
