जनता भ्वाइस बागलुङ माघ ३, बेनीदेखि नारायणगढ हिडेको ग १ ख ६१०८ नम्बरको बस पर्वतको कुश्मा नगरपालिका १ मालढुंगामा दुर्घटना हुँदा ४ जनाको मृत्यु भएको छ भने ३६ जना घाइते भएका छन् ।
उक्त गाडी सडकदेखि ६० मिटर तल कालीगण्डकी नदीमा खस्दा तीनजनाको घटनास्थलमै र एकको अस्पतालमा मृत्यु भएको हो।प्रहरीका अनुसार मृत्यु हुनेमा एक महिला र ३ पुरुष छन् । उनीहरुको हाल सम्म पहिचान भएको छैन ।
बेनीस्थित बस काउण्टरबाट १४ जनाको टिकट काटेर छुटेको बसमा ३९ जना यात्रु भएको अनुमान प्रहरीले गरेको छ । पर्वतका ट्राफिक प्रहरी इन्चार्ज रामकृष्ण गौलीका अनुसार घाइते ३६ जनालाई घटनास्थलबाट उद्धार गरि उपचारका लागि धौलागिरी अञ्चल अस्पतालमा लगिएको छ ।
दुर्घटनाको कारण तीव्र गति र ओभरलोड भएको यात्रुहरूले बताएका छन्। २५ सिटको बसमा क्षमता भन्दा बढी यात्रु चढाएको पाइएको छ ।
