जनता भ्वाइस २०७४ वैशाख ६– कैलाश विकास बैंकको पोखरा लामाचौर शाखाका प्रमुख रविचन्द्र खनाल करोडौं रुपैयाँ अनियमितता गरी बेपत्ता भएका छन् । चैत मसान्तसम्मको त्रैमासिक हिसाबकिताब बन्द गरेलगत्तै उनी बेपत्ता भएका हुन् ।
शाखा प्रमुख बेपत्ता भएपछि बैंकले नेपाल प्रहरीको केन्द्रीय अनुसन्धान ब्युरोमा उजुरी गरेको छ । बैंकले मंगलबार कास्की प्रहरीमा पनि उजुरी गर्दै शाखा प्रमुख खनाल बिना सूचना सम्पर्कविहीन बनेको र आर्थिक अनियमितता गरेको उल्लेख गरेको छ ।
ग्राहकले खातामा जम्मा गरेको रकम हिनामिना गरेको र खातामा जम्मा गर्न भनेको पैसा आफैंले चलाएको, सर्वसाधारण र सहकारीबाट पनि मोटो रकम लिएर खनाल वेपत्ता भएको आरोप छ । ‘आइतबारदेखि अफिस आउनुपर्ने नआएपछि प्रहरीमा खबर गर्यौं’, बैंकका प्रमुख कार्यकारी अधिकृत (सीईओ) कृष्ण लामिछानेले अन्नपूर्णसँग भने ।
चैत मसान्तमा ३ महिने हिसाबकिताब गर्न खनाल कार्यालयमा बेलुका ७ बजेसम्मै बसेका थिए । सहकर्मीहरुलाई आइतबार आफू ढिलो आउनसक्ने बताएका उनी उक्त दिन कार्यालय नगएपछि शंका गरिएको थियो । खनाल ६ महिनाअघिमात्रै कैलाश बैंकको लामाचौर शाखा प्रमुख भएर गएका थिए । नेपाल एक्सप्रेस फाइनान्सको पोखरा सभागृहमा कार्यरत खनाल फाइनान्स कैलाशसँग मर्ज भएपछि न्युरोड शाखामा खटाइएका थिए । लामाचौरमा शाखा प्रमुख रिक्त रहेपछि उनी त्यहाँ गएका हुन् ।
शाखा प्रमुख खनाल अनियमितता गर्दै बेपत्ता भएपछि कैलाश विकास बैंकको केन्द्रीय कार्यालय काठमाडौंबाट टिम आएर हिसाब किताब गडबडीको छानबिन गरिसकेको छ । के कति अनियमितता भएको भन्ने लेखापरीक्षकको प्रतिवेदनपछिमात्रै थाहा हुने सीईओ लामिछानेले जानकारी दिनुभयो । केन्द्रीय अनुसन्धान ब्युरोले समेत उक्त प्रतिविदेन चाहेको पनि उहाँले बताउनुभयो ।
ब्युरोकी प्रवक्ता एसपी मीरा चौधरीले बैंकबाट शाखा प्रमुख सम्पर्कविहीन बनेको उजुरी आफूहरुकहाँ परेको अन्नपूर्णसँग बताउनुभयो । ‘उजुरी आएको छ, तर यति रकम अनियमितता भन्ने चाहिँ खुलेको छैन’, उहाँले भन्नुभयो ।
बैंकर खनालले बैंक, ग्राहक र सहकारीबाट करोडौं रुपैयाँ लिएको प्रारम्भीक अनुमान स्थानीय प्रहरीले गरेको छ । स्रोत भन्छ, ‘ठूलो रकम बैंकमा जम्मा गर्न आएका ग्राहकसँग बढी ब्याज दिन्छु भनेर पैसा लिने गरेका थिए । सहकारीहरुलाई पनि फकाएर ठूलै पैसा फुत्काउन सफल भएछन् ।’
२०५० को दशकमा काठमाडौंबाहिर पहिलोपटक खुलेको अन्नपूर्ण फाइनान्स विकास बैंक हुँदा कैलाश नाम रहेको हो । पोखरामै केन्द्रीय कार्यालय रहेको मेट्रो विकास बैंक र नेपाल एक्सप्रेस फाइनान्स एक वर्षअघि कैलाशमा मर्ज भएका थिए । बेपत्ता बैंकर खनाल कास्की फाइनान्स, स्टेन्डर्ड फाइनान्स, माछापुच्छ«े बैंक र नेपाल एक्सप्रेस फाइनान्स हुँदै कैलाश विकास बैंक आइपुगेका हुन् । खनाल सेयर कारोबारमा र विभिन्न सहकारीमा समेत संलग्न रहेको बताइएको छ ।
लायन्स क्लबको सम्मेलनका क्रममा यसअघि अमेरिका पुगेका खनाल पैसा हिनामिना गरी उतै भागेको प्रारम्भीक अनुमान छ । त्रिभुवन विमानस्थलस्थित अध्यागमनमार्फत उनी देशबाट बाहिरिइसकेको प्रहरीले पत्ता लगाइसकेको छ ।
