कटारीमा प्रथम मेयरकप क्रिकेट प्रतियोगिता हुँदै

कटारी |उदयपुरको कटारीमा प्रथम कटारी नगर मेयरकप क्रिकेट प्रतियोगिता हुने भएको छ । कटारी नगरपालिकाद्धारा प्रायोजित तथा नगर खेलकुद विकास समितिको सहयोगमा हुने प्रतियोगिता २०८२ बैशाख ६ गते सम्म चल्ने आयोजक कटारी क्रिकेट क्लबले पत्रकार सम्मेलन मार्फत जानकारी गराएको छ ।
कटारी ४ स्थित टाईगर खेल मैदानमा हुने प्रतियोगितामा ८ वटा टिमहरुले सहभागिता जनाउने छन ।
प्रतियोगिताको बिजेताले नगद ५० हजार रुपैया र टफी मेडल र प्रमाणपत्र पाउनेछ । उपबिजेता टिमले नगद ३० हजार ट्रफी,मेडल र प्रमाणपत्र हजार पाउने आयोजकले जनाएको छ ।
प्रतियोगिता सम्पन्न गर्न कुल ३ लाख २९ हजार २ सय रुपैया खर्च लाग्ने अनुमान गरिएको आयोजकले जनाएको छ । जस मध्य कटारी नगरपालिकाले १ लाख ५० हजार बजेट उपलब्ध गराएको छ भने बाँकी रकम भने विभिन्न संघ संस्था खेलप्रेमी संग संकलन गरिएको आयोजक क्लवका सचिव सन्त बहादुर सुनुवारले जानकारी दिनु भयो ।
लोकप्रिय खेल क्रिकेट खेल भएकोले युवालाई खेल प्रति प्रोत्साहित गर्दै दुव्र्यसन तथा कुलतबाट बच्न टेवा पुग्ने सुनुवारको भनाई छ ।
यसै गरी नगरखेलकुद विकास समितिका उपाध्यक्ष राजकुमार थापाले यस क्रिकेट प्रतियोगिताले आगामी दिनम कटारी क्षेत्रमा क्रिकेट खेल अझै लोकप्रिय हुने र सवैको साझा रोजाईको खेल बन्ने बताउनु भयो । थापाले नगर खेलकुद विकास समितीले खेलकुद क्षेत्रको विकासका लागि समिति सधै लागि पर्ने र सबै खेललाई बराबर प्राथमिकता दिने पनि बताउनु भयो ।